Bespreking van die Aanslag op Christelike en Afrikaanse Onderwys
Vrydag 11 Junie 2004 om 18:30 vir 19:00
In die saal van Hoërskool Garsfontein, Jacqueline rylaan, Garsfontein, Pretoria
(omtrent twee blokke vanaf Hans Strijdomlaan.)
Verteenwoordigers van Afrikaanse openbare skole, Afrikaanse privaatskole en tuisonderwys bespreek die aanslag op Christelike en Afrikaanse onderwys.
Tot 95% van alle voormalige Afrikaans-eentalige skole het reeds meertalig en multikultureel geword, of verengels.
Daardie skole is verlore vir die Afrikaanse kultuurruimte. Daardie skole is verlore as strukture vir die transmissie van die Afrikaanse kultuur.
Kundiges uit al die sektore van die Afrikaanse onderwys is dit eens dat die bedreiging kritieke afmetings aangeneem het.
Die seminaar ondersoek die uitgesproke politieke en ideologiese doelwitte van die owerheid wat multigeloofsoortuigings en multikulturele houdings en gesindhede invoer. Hierdie praktyk moet kinders toenemend van hul eie taal, kultuur en godsdiens vervreem, en hulle by die sogenaamde 'common culture' inlyf..
Die vergadering word gelei deur Mnr Louis Smuts van die openbare skoolsektor in sy hoedanigheid as voorsitter van Tabok, die Trust vir Afrikaanse Beheerrade vir Onderwys en Kultuur. Leendert van Oostrum sal die gesprek inlei met 'n multimedia-aanbieding van die navorsing oor die ideologies-gedrewe aanslag teen Afrikaanse onderwys. 'n Paneel kundiges sal dan voorgaan in die bespreking.
Die paneel bestaan uit Mnr Hannes du Preez van die BCVO, Mnr Dirk Hermann van Solidariteit; Dr Irma Horn, bestuurslid van die VCHO en onderwysdosent van Unisa; Prof Koos Malan, hoogleraar in regsgeleerdheid en voorsitter van Regslui vir Afrikaans; Mnr Leendert van Oostrum van die Pestalozzi Trust regsfonds vir tuisonderwys en Dr Ben van Tonder, van die Christenonderwysforum. Aksie Vrouekrag sal ligte aandetes en ander verversings te koop aanbied vanaf 18:30.
Die Christenonderwysforum doen 'n dringende beroep op ouers, onderwysers, kerkrade en gemeentes om nie hierdie geleentheid te laat verbygaan nie. Slegs as ons ingelig is kan ons die regte van ons kinders beskerm teen onregmatige aantasting deur die owerheid.